JOERNAAL

BYLAE TOT VOLKSBLAD

VRYDAG 26 NOVEMBER 2004- Bl. 3

Dié Windpomp bring 'n vars bries

JACO JACOBS

DAAR is twee kante aan die debat oor backtracks en "kombuismusiek", sê Wynand Burger, 'n 34-jarige boorling van die Karoodorp Brandvlei wat deesdae onder die naam Wynand Windpomp die land aan die brand sing met sy debuutalbum Te ladida . "Veral as jy op die platteland speel, kan 'n mens nie 'n orkes bekostig nie. Ek sal baie graag by elke optrede saam met 'n band wou speel, maar dit is eenvoudig te duur.

"Sodra jy egter groter gaan -as jy R20 000 of R30 000 per optrede begin vra -- moet jy vir mense waarde gee. Dan moet jy 'n orkes betaal."

Ek speel 'n bietjie duiwelsadvokaat: Dis sekerlik maklik om 'n kunstenaar wat ligte musiek maak en 'n verhoognaam soos Wynand Windpomp gebruik te stereotipeer?

Ja, sê Burger, hy is juis omgekrap omdat sy en Gian Groen se musiek onlangs van 'n bekende radiostasie se speellys gehaal is omdat hulle name glo "te vlak" is. "Daar's 'n eenvoudige rede waarom ek die naam Wynand Windpomp gekies het. My CD het in dieselfde tyd as Wynand Strydom s'n uitgekom. Ek het geweet ditsou verwarring skep as daar twee Wynands gelyk op die musiektoneel beland. Ek het 'n restaurant in Brandvlei, Die Windpomp, en toe ek aanvanklik begin speel, het baie plekke sommer my naam op die plakkaat gesit as 'Wynand van Die Windpomp'."

Maar sê hy, hy vat kritiek "soos 'n T-bone -- eet die vleis en spoeg die been uit".

Party kritici, soos Mariana Malan, musiekresensent van Die Burger , is baie opgewonde oor Wynand Windpomp. Malan skryf in 'n resensie: "Dis altyd 'n heerlike bonus as 'n album op jou lessenaar beland en jy heeltemal onverhoeds betrap word. Die verrassing is nog groter as jy meen dit is weer een van 'daardie' albums en jy heeltemal verkeerd bewys word. Wynand Windpomp se album is een van hierdie lekkertes. Daar is 'n goeie mengsel oorspronklike en reeds bekende liedjies op die album. Dit is egter die liedjies uit die hart, soos Brandvlei en veral Bring vir my saam wat werklik indruk maak. Wynand Windpomp bring 'n vars bries na die plaaslike musiekmark."

Anders as baie van die nuwe Afrikaanse ligteliedjiekunstenaars skryf Burger self 'n groot deel van sy musiek. "Baiekeer kry ek idees vir 'n liedjie as ek op diepad is en dan sit ek dit sommer as 'n reminder op my selfoon. As ek later weer daarna kyk, begin dit partykeer sin maak. 'n Mens moet nooit dink enige idee is simpel nie."

Hy voel daar is nog heelwat plek vir verruiming in die Afrikaanse musiekmark -- in alle genres. "Afrikaans is nog 'n jong mark. Dis nodig dat mense hulle minds 'n bietjie oopmaak. Iemand soos Nianell het die regte stemkwaliteit om dit gróót te maak oorsee -hoekom gebeur dit dan nie? Hoekom ondersteun mense haar nie méér nie?"

Hy bewonder Afrikaanse kunstenaars soos Dozi, Theuns Jordaan, Anton Goosen en Nianell ("toevallig almal ouens wat nie van mekaar hou nie") en Steve Hofmeyr. "Ek hou van Steve se stem en sy gatskophouding. Hy het 'n houding wat jy kan blik en uitvoer. As alle Suid-Afrikaners so 'n houding gehad het, was ons land 'n beter plek."

Burger, 'n oud-Matie wat 'n ruk lank 'n selferkende jack-of-all-trades was voordat hy sy nis gevind het, toer deesdae die hele land vol en tree veral by langarmdansklubs op.

Maar ná 'n paar dae op die pad trek sy hart weer 'n punt terug Brandvlei toe, waar hy tot rus kan kom. En dan is hy sommer net weer Wynand van Die Windpomp.